Nyumba 7 Za Bomoka Na Mtu Mmoja Kufariki Dunia Wilayani Kalambo.

Posted on: March 20th, 2020

MVUA zinazoendelea kunyesha mkoani Rukwa zimeendelea kusababisha maafa kwa baadhi ya maeneo huku mtu mmoja akifariki dunia na nyumba saba kuanguka katika wilaya ya Kalambo .

Katika tukio la kwanza limetokea katika kijiji cha Kanyarakata kata ya Mbuluma, ambapo mkazi mmoja wa kijiji hicho alifariki dunia wakati akivusha mifugo yake kwenye mto Kalambo na kusombwa na maji na kukutwa akiwa amefariki dunia.

Kufuatia hali hiyo mkuu wa wilaya ya Kalambo Julieth Binyura aliwasihi wananchi  wilayani humo kuwamakini  hususani katika  kipindi  hiki cha masika.

‘’wananchi wanatakiwa kuwa makini hususani wakati wa kuvuka kwenye mito  kwani  mvua ni nyingi na zinaweza kusababisha matatizo dhidi yao kama ilivyotokea katika  kata  ya  Mbuluma’’. alisema Binyura.

 Katika tukio lingine limetokea katika kijiji cha kasanga ambako nyumba saba zimeanguka kufuatia mvua kubwa ilionyesha  katika  maaeneo hayo.

Afisa tarafa  hiyo Endrue  Manyema  Ngindo , amesema  chanzo ni kutokana na mto Katete kuhama njia na kupeleka maji yake katika  makazi  ya watu  na hivyo  kusababisha baadhi ya nyumba kuanguka.

Alisemaa licha  ya  hilo  mvua  hiyo ilisababisha maafa  katika  kijiji cha Kipwa na kupelekea familia moja kukosa makazi.

Hata hivyo siku za hivi karibuni mkuu wa mkoa wa Rukwa Joachim Wangabo alitembelea maeneo ya bonde la ziwa  Rukwa  kufuatia maafa ya mvua kutokea  katika  vijiji  vya Kinambo, Maenje, Milepa, Sakalilo na Talanda vilivyopo kata ya Milepa na Ilemba, katika bonde la Ziwa Rukwa Wilayani Sumbawanga,  ambako Zaidi  ya  nyumba 135 zilibomoka  na kaya 72 kukosa makazi .

Katika  salamu zake  Mh. Wangabo alisema kuwa janga hilo hakuna aliyelitegemea na kulifananisha tukio hilo na ajali ambayo haina kinga na ndio sababu iliyopelekea kufika hapo kutoa pole kutokana na janga hilo na kuwapongeza wale waliowahifadhi ndugu na jamaa ambao wamekosa mahala pa kuishi kutokana na nyumba zao kuangushwa na mvua hiyo.

Aidha, katika ziara yake hiyo alitoa kilo 500 za unga wa sembe pamoja na kilo 200 za maharage kwa kamati ya maafa ya wilaya ili waweze kugawa kwa waathiriwa wa mvua hiyo katika vijiji hivyo vya bonde la Ziwa Rukwa na kuwataka wadau mbalimbali kuweza kujitokeza kusaidia waathiriwa hao ili waweze kurudi katika maisha yao ya kawaida.