Ocs Kituo Cha Polisi Matai Azindua Mashindano Ya Mpira Wa Miguu Wilayani Kalambo.

Posted on: September 10th, 2023

Mkuu wa kituo cha polisi Matai ASP Hassan Nkindwa amezindua rasmi mashindano ya ligi ya mpira wa miguu yanayofahamika kama DKT SITIMA MATAI OPEN SCHOOL yanayoshirikisha timu 18 kutoka kata 23 za halmashauri ya wilaya ya Kalambo na kuwataka vijana kuyatumia mashindano hayo katika kuibua vipaji na kuimarisha afya

Akiongea kwa niaba ya mkuu wa polisi wilaya,mkuu wa kituo hicho Hassan Nkinda amesema michezo hiyo ina lengo la kuibua vipaji vya vijana pamoja kutoa elimu kwa watumiaji  wa vyombo vya moto wakiwemo madereva wa usafiri wa pikipiki maarufu kama bodaboda na madereva wa bajaji.

Mapema akiongea na wadau wa michezo wilayani humo mwenyekiti wa mashindano hayo Kalos Mbalazi amesema mshindi wa kwanza atajipatia fedha kiasi cha shilingi laki tatu (300000/=) mshindi wa pili atajipatia shilingi laki mbili (200000/=) na mshindi wa tatu atajipatia shilingi laki moja (100000/=) na kwamba wachezaji bora na walinda lango (goalkeeper) watazawadiwa fedha kiasi cha shilingi elfu ishirini (20000/=).

Kaimu Afisa michezo wilayani humo James Masoya aliwataka wadau kuendelea kujitokeza kudhamini kwenye michezo ili kupata vijana wengi zaidi wenye uwezo.