Wanawake Wataka Sacos Za Mikopo Kudhibitiwa

Posted on: March 9th, 2020

WANAWAKE mkoani Rukwa wameiomba serikali kuweka utaaratibu maalumu ambao utasaidia wao kupata mikopo kwa urahisi zaidi pamoja na kuzisimamia taasisi za kifedha{SACOS}ambazo zimekuwa zikitoa mikopo kwa gharama kubwa na hivyo kupelekea wao kushindwa kujikwamua kiuchumi.

Maadhimisho ya siku ya wanawake hufanyika kila mwaka hapa nchini, ambapo kwa mwaka huu maadhimisho hayo kimkoa yamefanyika  katika Kata ya Kisumba wilayani Kalambo mkoani Rukwa na huku  mgeni  Rasmi akiwa ni mkuu wa mkoa huo Mhe. Joachim Wangabo.

Akisoma taarifa fupi mbele ya mgeni Rasmi, mmoja wa wanawake  hao Leonala Jailos, amesema serikali haina budi kuwasidia kwa kutoa  mikopo  yenye riba nafuu  kupitia vikundi  na majukwaa yao.

Amesema Halmashauri zimekuwa zikitoa fedha  kidogo za mikopo hali  ambayo imekuwa ikipelekea baadhi yao kukosa mikopo na kujitokeza  malalamiko.

Amesema serikali haina budi kuyawezesha majukwaa ya  wanawake yaliyopo katika Halmashauri zote  nne za mkoa huo na kusema kwa kufanya hivyo kutaongeza uwajibikaji kwa walengwa na  hatimaye  kujikwamua  kiuchumi.

Mkuu wa mkoa wa Rukwa Mhe. Joachim Wangabo ameziagiza Halmashauri  zote za mkoa huo kuhakikisha zinatoa mikopo ya wananawake na vijana na huku akiisifu Halmashauri ya Wilaya ya Kalambo na Manispaa ya  Sumbawanga  kwa  kutoa  mikopo  hiyo.

‘’Katika mwaka huu wa fedha 2019/20 katika  risala  zenu  hapa  mlionesha  wazi kwamba  fedha mnazopewa  na Halmashauri  kuwa hazitoshi  na hii  nitaiona  kwa  nini  hazitoshi, fedha  hizo  zinatakiwa  zitolewe kama sheria inavyo elekeza  lakini  Halmashauri  zetu  zimekuwa  hazitoi.’’ alisema Wangabo.