Wasifu Wa Marehemu Ephraim M. Moses Kuzaliwa

Posted on: June 4th, 2020

Ephraim M. Moses alizaliwa mnamo tarehe 18/04/1966 katika kijiji cha Mwakaleli Wilaya ya Rungwe.

Marehemu alimaliza shule ya msingi Kandete mwaka 1982, na kujiunga na mafunzo ya Ualimu ngazi ya Cheti daraja B mwaka 1983 na kuhitimu mwaka 1985. Baada ya hapo Marehemu akajiunga na masomo ya Sekondari kama Mtahiniwa binafsi mwaka 1991 hadi 1992. Mwaka 1992 hadi 1994 Marehemu alijiunga na Mafunzo ya ualimu Daraja la IIIA Chuo cha Ualimu Tukuyu. Mwaka 1995 hadi 1996 marehemu alijiendeleza na masomo ya juu ya sekondari kama mtahiniwa binafsi katika kituo cha Shule ya  Sekondari Loleza.

Mwaka 1997 hadi 1999 marehemu alijiunga na Elimu ya Stashahada katika chuo cha Elimu Morogoro. Mwaka 2001 hadi 2007, marehemu alijiunga na Chuo Kikuu Huria cha Dar Es Salaam na kupata Shahada yake ya kwanza ya Sanaa ya Elimu. Mwaka 2011-2013 Marehemu alipata Elimu ya Shahada ya Uzamili katika Sanaa ya Maendeleo ya Chuo Kikuu Dodoma.

AJIRA

Marehemu aliajiriwa mara ya kwanza Mwaka 1986-1989 katika shule ya Msingi Ikomelo Rungwe, kisha akahamia shule ya Msingi Lubala Rungwe na baadae akajiendeleza kielimu na kuhamishwa  katika Ofisi mbali mbali za Serikali ikiwemo shule ya Sekondari Mwakaleli, Ofisi ya Mkuu wa Mkoa Mbeya na  Mwaka 2014  Marehemu Ephraim Moses alihamishiwa Halmashauri ya Wilaya ya Kalambo akafanya kazi ya Afisa Elimu Sekondari Wilaya hadi umauti ulipompata Tarehe 28/05/2020.

MAELEZO YA UGONJWA

Marehemu alianza kujisikia vibaya tarehe 27/5/2020 na hali ilipozidi Marehemu Moses alikimbizwa Hospitali ya Mkoa wa Rukwa tarehe 28/5/2020 hapo ndipo umauti ulipomkuta baada ya kulazwa Hospitalini hapo.

Mnamo tarehe 28/05/2020 Jioni mpendwa wetu aliaga Dunia. Merehemu ameacha Mjane na watoto .