Watoto 250 Wagundulika Kuwa Na Surua Na Lubella Wilayani Kalambo

Posted on: February 19th, 2024

Mkuu wa wilaya ya Kalambo mkoani Rukwa Lazaro Komba  amesema watoto  250 wenye  umri chini ya miaka 5 wamegundulika kuwa na ugonjwa wa Surua na lubella katika vijiji 10 vya wilaya hiyo  ambapo watoto 16  kati yao wametokea katika kijiji cha Msanzi.

Aliyasema  hayo wakati  uzinduzi wa kampeni ya chanjo ya Surua na Rubella uliofanyika  kwa ngazi ya wilaya katika kijiji cha Msanzi wilayani humo na kubainisha kuwa Halmashauri ya Kalambo ilipata mgonjwa wa kwanza wa Surua / Rubella Januari 2023  katika  kijiji cha Mlenje  kata ya Legezamwendo na baadaye kuenea hadi Septemba 2023 katika maeneo mengine ikiwemo vijiji vya Tunyi, Ilonga,Legezamwendo, Mambwekenya, Limba, Mkowe,Samazi ,Kilewani, Kapele, na Msanzi.

‘’Jumla ya watoto kumi na sita 16 walibainika kuwa na ugonjwa wa surua/Rubella , walipatiwa matibabu mapema na hatimaye kurudi katika hali zao za kawaida za kiafya  na hakuna vifo ambavyo vilijitokeza’’ alisema komba

Awali akiongea wakati uzinduzi wa kampeni hiyo mganga mkuu wa Halmashauri hiyo Dkt Emmanuel Mhanda,  alisema  serikali kupitia wizara ya afya kwa kushirikiana na wadau wa maendeleo imeandaa kampeni ya kitaifa ya kutoa chanjo ya Surua na Rubella kwa watoto kuanzia miezi 9 hadi 59 ili kuwakinga watoto wote  ambao wapo kwenye hatari ya kupata magonjwa hayo ambapo watoto 42,805 wanatarajiwa kufikiwa na kampeni hiyo.

‘’Surua na Rubella ni magonjwa yanayoweza kukingwa kwa chanjo pekee .chanjo hii hutolewa dozi mbili , dozi ya kwanza ni pale mtoto anapofikisha umri wa miezi 9 na dozi ya pili anapewa mtoto anapofikisha miezi 18 katika utaratibu wa kawaida ‘’ alisema Mhanda.

Hata hivyo baadhi ya madaktari wilayani humo akiwemo Abdulkharim Juma, alisema ugonjwa huo unasababishwa na virusi vinavyoenezwa kwa njia ya hewa na kwamba ugonjwa huo unaweza kumpata mtu wa rika lolote na kwamba huathiri zaidi watoto chini ya miaka mitano ambao hawajapata chanjo ya surua /Rubella.

‘’Dalili za ugonjwa wa surua na Rubella ni pamoja na kupata homa ,mafua,kikohozi ,macho kuwa mekundu  na kutoa majimaji  na vipele vidogo  ambavyo huanza kwenye paji la uso , nyuma ya masikio na kusambaa usoni na mwili mzima.

Awali akiongea na wakazi wa kijiji cha Msanzi katibu tawala wilayani humo Servin Ndumbalo , aliwataka wazazi na walezi kuwapeleka watoto wao kwenye vituo vya kutolea huduma za afya ili waweze kupata kinga dhidi ya magonjwa yanayoweza kuzuilika  kwa chanjo ikiwemo Surua na Rubella.

Baadhi ya wakazi wa wilaya ya Kalambo akiwemo Patrick Sichone  wameipongeza serikali kwa kuanzisha kampeni ya chanjo hiyo na kwamba itawawezesha kuondokana  ugonjwa huo.

Hata hivyo, timu za utoaji wa chanjo zimeanza kutoa huduma za afya , mashuleni , sokoni , makanisani ,miskitini na  kwenye maeneo mengine yenye mikusanyiko huku lengo likiwa ni kufikia watoto 42,805 wenye umri  kati ya miezi 9 hadi 59.

Mwisho…..