VIONGOZI WA SERIKALI ZA VIJIJI WATAKIWA KUSHIRIKI UTATUZI MIGOGORO YA KIFAMILIA.

Posted on: December 10th, 2024

Kaimu mkurugenzi mtendaji halmashauri ya Kalambo Wambura Sunday amesema serikali haitasita kuwachukulia hatua kali za kisheria ikiwemo kuwafikisha mahakamani wazazi na walezi ambao watashindwa kuwaandikisha na kuwapeleka shule watoto wao ifikapo Januari 2025.

Ameyasema hayo wakati wa maadhimisho ya kilele cha siku 16 za kupinga ukatili wa kijinsia ambayo kwa ngazi ya wilaya yamefanyika katika kata ya Katete wilayani humo na kusisitiza wazazi na walezi kuhakikisha wanawapeleka shule watoto wao ifikapo Januari 2025 ikiwemo kuwaandalia mahitaji yao muhimu ya shule.

Kwa upande wake afisa ustawi wa jamii wilayani humo Hussein Kharimu ametumia fursa hiyo kuwataka wazazi na walezi kuwa sehemu ya kupinga vitendo vya ukatili wa kijinsia ikiwemo kutoa taarifa za mtu au watu wanaojihusisha na vitendo vya ukatili.

Aidha amewataka wazazi na walezi kujenga mazoea ya kuwa karibu na watoto wao kwa ajili ya kujua changamoto zinazowakabili pindi wanaporudi kutoka shule na kusisitiza viongozi wa serikali za vijiji kuwa sehemu ya kusuluhisha migogoro ya kifamilia ili kuwawezesha watoto kulelewa katika mazingira bora na wezeshi.