Serikali Yaongeza Vijiji 13 Kupatiwa Umeme’’kalambo.

Posted on: September 20th, 2019

Shirika la umeme TANESCO wilayani kalambo Mkoani Rukwa limewakikishia  wananchi wa vijiji vilivyopo katika kata za lyowa na Matai kuwa litawapatia huduma ya umeme ndani ya mwaka  huu wa 2019 kutokana na serikali kuongeza vijiji 13 kati ya 42 vilivyokuwa vimepatiwa  huduma  hiyo katika awamu ya tatu.    

Hatua hiyo imekuja kufuatia malalamiko yaliyojitokeza kwenye mkutano wa hadhara uliofanyika katika kijiji cha Santamaria ambapo wananchi wa kijiji cha Kisungamile kilichopo kata ya Matai wilayani kalambo mkoani hapa, walililalamikia shirika hilo kutowapelekea huduma husika licha ya vijiji vingine kuwa na umeme kwa muda mrefu sasa.

Wamesema licha ya kijiji hicho kuwa ndani ya mamlaka ya Mji mdogo wa Matai ambao ndio makao makuu ya Halmashauri  ya Wilaya ya Kalambo, hakina umeme na wakati huo vijiji vingine vinavyo unda mji huo vikiendelea kunufaika na huduma hiyo  na kuiomba serikali  kupitia  shirika la umeme TANESCO kuwangalia kwa jicho la tatu.

‘’kijiji chetu ni miongoni mwa vijiji  vinavyounda mji mdogo wa Matai lakini tunashangaa kuona  vijiji  vingine vimepatiwa  tayari  huduma  ya umeme  lakini sisi bado mpaka. Tunaliomba shirika  la umeme litungalie kwa jicho la tatu ili nasisi tuweze kunufaika  na huduma hii muhimu.’’Walisema wananchi hao.

Meneja wa shirika la umeme TANESCO wilayani humo Japhet Malongo amesema serikali imeongeza  vijiji 13 ambavyo  vitapatiwa huduma  hiyo  katika awamu inayoendelea hivi sasa  na kijiji cha Kisungamile kikiwa miongoni na kuwataka  wananchi kuendelea kuwa na subira  wakati utekelezaji ukiendelea. 

Mkuu wa wilaya hiyo Julieth Binyura, amewataka wananchi kuendelea kulipa fedha ya huduma kiasi cha shilingi elfu ishirini na saba  na kusema lengo  la  serikali  ni kuhakikisha kila kijiji kinapata  umeme.