Maelfu Ya Waumini Wilayani Kalambo Mkoani Rukwa Wajitokeza Kuombea Uchaguzi

Posted on: August 31st, 2020

Waamini pamoja na wachungaji kutoka madhehebu mbalimbali ya dini kwa kushirikiana na kamati ya ulinzi na usalama wilayani Kalambo mkoani Rukwa, wameungana kuendesha kongamano la kumuomba mwenyezi Mungu ili uchaguzi mkuu wa Rais, Wabunge na Madiwani unaotarajiwa kufanyika mwezi Oktoba mwaka huu,uwe wa haki ili kuilinda amani na utulivu uliopo kwa lengo la kuivusha nchi ikiwa salama bila kumwaga damu.

Makamu askofu wa kanisa la FPCT jimbo la Rukwa na katavi Andrea Mwakalinga amesema  watumishi wa Mungu tunahitaji kamapeni safi bila ugomvi na kwamba kufanya fujo ni kukosa hekima ya kimungu.

Amesema  kwa kuwa  wagombea wote wanatoka  katika makanisa na misikiti yetu, Mashehe na Wachungaji tuta hakikisha tuna hubiri amani na utulivu kwenye mihadhara yetu.

‘’sisi tuna watu wengi wanao tufuata makanisani na misikitini mwetu, hivyo hatunabudi kuhimiza upendo ili zifanyike kamapeni zisizo na ugonvi kwenye majukwaa ya siasa. Na ijulikane kuwa mtu yeyote atakaye fanya kampeni za fujo kuelekea uchaguzi huu, atakuwa hana nia njema katika ustawi wa nchi yetu.’’ Amesema mwakalinga.

Shehe  wa  wilaya  hiyo Sulemani Amani, alisema  kila  mtu  amefika  katika  eneo  hilo kwa  lengo la kufanya maombi na kuwataka  washirika wote kuomba  katika  roho na kweli ili kuhakikisha maombi hayo yanafika kwa mwenyezi mungu kama  ilivyo kusudiwa.Mkuu wa wilaya ya Kalambo Calorius Misungwi, amesema kila mwananchi anatakiwa kuchagua  viongozi bora baada ya kusikiliza sera  zao.

‘’Sisi kazi  yetu kama  wananchi ni kusikiliza sera na kuchagua viongozi wenye sifa  safi. Hivyo wote tuhamasike na tujitokeze kwa  wingi  kuchagua  viongozi bora  ambao  watakuwa  msaada  kwa  wilaya na taifa  kwa  ujumla.’’ Amesisitiza Misungwi.