WAZAZI NA WALEZI WATAKIWA KUWAEPUSHA WATOTO DHIDI YA MATUMIZI YA SIMU ZA MKONONI

Posted on: November 30th, 2025

Wazazi na walezi wilayani Kalambo mkoani Rukwa wameshauriwa kuwaepusha watoto na matumizi ya simu na badala yake wajikite zaidi katika kuwahimiza kusoma vitabu na maandalio ya nyumbani (home package) wanazopewa na walimu wao kwa lengo la kujiepusha na maudhui mabaya ambayo yanaweza kuwasababishia kujifunza maadili mabaya kupitia mitandao ya kijamii ikiwemo Tik tok.

Wameyasema hayo wakati wa mahafahali ya kuhitimu elimu ya awali katika shule ya msingi Gabriel ambayo ni ya mchepuo wa kingeleza, ambapo wadau wa elimu wamesisitiza wazazi na walezi kuwa sehemu ya kuwaepusha watoto wao na matumizi ya mitandao ya kijamii.

Kwa upande wa mmiliki wa shule hiyo ndugu Romuad Nziku, amesema licha ya hilo lengo la shule hiyo ni kufanya vizuri katika mitihani ya upimaji kwa ngazi ya mkoa na taifa kwa ujumla na kuwataka wazazi na walezi kuwapeleka Watoto wao kwenye shule hiyo kwani ada zao ni nafuu na inamazingira bora na wezeshi.

Kaimu afisa elimu msingi wilayani humo ndugu Wirbert Herman ametumia fursa hiyo kumpongeza mwekezaji wa shule hiyo kwa kuwekeza katika swala la elimu kwani uwepo wa shule hiyo utasaidia watoto kupata elimu bora, ikiwemo kujifunza na hatimaye ufaulu kuongezeka.