Million 140 Zatengwa Kwa Ajili Ya Umaliziaji Maboma Ya Zahanati Wilayani Kalambo

Posted on: February 6th, 2020

HALMASHAURI ya Kalambo mkoani Rukwa imesema imetenga fedha kiasi cha shilingi milioni 140 katika bajeti ya 2020/ 2021 kwaajili ya umaliziaji wa maboma ya majengo yote ya zahanati

Akiongea ofini kwake kaimu Mkurugenzi wa Halmashuari hiyo Magreth Kakoyo, alisema katika maboma yaliyobakia  Halmashauri inaendelea kufanya maandiko ili kuhakikisha yanakamilika na kutoa matunda kwa lengo la kusogeza huduma kwa wananchi.

‘’Halmashauri katika bajeti ya mwaka  2020/2021imetenga fedha kiasi cha  shilingi milioni 140 kwa ajili ya umaliziaji wa maboma yote ya zahanati   ikiwemo na maboma ya vijiji vya Tunyi, Mzungwa na Ilonga kwani vijiji hivi viko mbali na makao makuu ya Wilaya na kata husika haina kituo cha afya,

‘’Niendelee kuwahimiza wananchi waendelee kujitolea nguvu kazi kwenye kufyatua na kuchoma tofali, kusogeza mawe na mchanga pamoja na kujenga walau kufikia usawa wa linta kwani kipaumbele cha sasa ni kukamilisha maboma yaliyojengwa na wananchi wenyewe.’’ Alisisita na kuwaomba  wananchi katika maeneo hayo kuendelea kuwa wavumilivu.

Hatua hiyo imekuja baada  ya  kuwepo  kwa  malalamiko  kutoka kwa wananchi katika kata ya  Mambwenkoswe  juu ya maeneo  hayo kuwa na upungufu  wa  vituo  vya  kutolea  huduma  za afya  na huku kata  hiyo  ikiwa na zahanati moja licha ya kuwa na vijiji sita .

Diwani wa  kata hiyo Juliasi Kanowalya ,alisema wananchi wake wamekuwa  wakisafiri  umbali  mrefu   kufuata  huduma za matibabu  katika  zahanati  ya  Kalembe  ambayo inategemewa na kata nzima .

Alisema   baadhi  yao  wamekuwa  wakilazimika  kitibiwa  katika  nchi  jirani  ya  Zambia  kutokana na  vijiji  vyao kuwa na umbali wa zaidi ya km kumi  kutoka kwenye  maeneo  ya kutolea huduma za afya.