Mnaoishi Mabondeni Hamieni Kwenye Miinuko. DC Binyura

Posted on: April 28th, 2020

Mkuu wa wilaya ya Kalambo mkoani Rukwa Julieth Binyura amewaamuru wananchi wote katika kijiji cha Kipwa kilichopo mpakani mwa nchi ya Tanzania na Zambia kuhamia katika maeneo ya miinuko kufuatia kijiji hicho kuzingirwa na maji ya ziwa Tanganyika na kusababisha baadhi yao kukosa makazi baada ya nyumba zao kubomoka.

Hatua hiyo imekuja baada ya wakazi ya kijiji hicho kuiomba serikali kuweka huduma ya maji pamoja na kuboresha miundombinu ya barabara katika maeneo mapya ya milima ya mawe Sande  ambako wanatarajia kuhamia  hivipunde kufuatia kijiji chao  kuzingirwa na maji ya ziwa Tanganyika  na kupelekea baadhi yao kukosa makazi kutokana na nyumba kubomoka.

Wamesema tatizo kama hilo liliwahi kutokea mwaka 1984 na kujitokeza   tena mwaka huu ambapo nyumba kadhaa zimebomoka na kusababisha  hasara  kubwa.

‘’tunaiomba serikali kuangalia namna ya kutusaidia kupata huduma ya maji pamoja na kupasua barabara inayotokea Katika maeneo ya          Mpombwe,  ili kurahisisha usafiri wa watu na  bidhaa kwa njia  ya magari  tofauti na hivi sasa ambapo wanalazimika kutumia boti kupitia ziwa Tanganyika.

Kuhusu upatikanaji wa maji safi na salama, Kaimu Meneja wa RUWASA Wilayani Kalambo Fransis Mapunda, alisema Serikali inapeleka miundo mbinu ya maji safi na salama kijijini Kipwa na maeneo mengine ya mwambao wa ziwa Tanganyika kufuatia uwepo wa vyanzo vya maji ambavyo ni vya uhakika.

Akiongea ofisini  kwake, mkuu  wa  wilaya  ya  Kalambo  Jilieth Binyura, alisema serikali ina mpango wa kupeleka huduma ya maji pamoja na kuboresha  miuondombinu  ya  barabara  na kuwasihi  wananchi  kuwa na subira.

Aidha aliwasihi kuendelea  kuhamia katika maeneo  ya miinuko ili kuepukana na adha ya nyumba zao kubomoka kutokana na maji kuzingira maeneo  yao.

Alisema kubomoka  kwa  nyumba  katika  kijiji  cha  Kipwa  kumesababishwa na mabadiliko  ya  tabia  ya  nchi  ambayo  imepelekea maji ya  ziwa  Tanganyika  kujaa na  kuvamia nyumba za watu hatimaye baadhi  yao kukosa makazi.

‘’niwasihi  wananchi  wote kuacha tabia ya kukata miti ovyo na kuharibu uoto wa asili na hivi sasa ambao wanaona wako maeneo ya mabondeni ambayo ni hatarishi waanze kuhamia  maeneo  ya miinuko.