Soko La Samaki Kasanga Laongeza Fursa Kwa Wavuvi Mwambao Wa Ziwa Tanganyika.

Posted on: March 4th, 2020

Wavuvi katika mwambao wa ziwa Tanganyika mkoani Rukwa wameshauriwa kujenga mazoea ya kujiunga kwenye vikundi ambavyo vitasadia kupata mikopo kiurahisi kwa lengo la kujikwamua kiuchumi.

Ziwa Tanganyika  kupitia  eneo  la Kasanga, Muzi,Samazi na visiwa vyake lina  wavuvi  wapatao elfu moja  na  vyombo  vya uvuvi mia saba, lakini  wavuvi hao wamekuwa  wakikabiliwa  na changamoto ya  soko la kuuzia samaki na hivyo  kulazimika kupeleka samaki zao nchi jirani ya Zambia na kuikosesha  Halmashauri ya Wilaya ya Kalambo mapato yatokanayo na mazao ya uvuvi  kufuatia kuto tumika ipasavyo soko hilo tangu kujengwa kwake.

Mapema  hapo  jana, Mkurugenzi  Mtendaji  wa  Halmashauri  hiyo Msongela Palela alitembelea na kukagua eneo  la  soko  hilo  na kuwaruhusu  wavuvi  pamoja  na wafanyabiashara kuanza kulitumia soko hilo baada kulifanyia ukarabati, kununua na kuweka vichanja pamoja na miundo mbinu ya umeme.

Licha ya hilo, Msongela aliwasisitiza wavuvi kujiunga kwenye vikundi ili iwe rahisi kupata mikopo isiyokuwa na riba kutoka Halmashauri na ambayo itawasaidia  kujikwamua  kutoka hali duni kiuchumi na kukuza biashara zao.

Kwa  upande  wake  Mweka hazina  wa Halmashauri  hiyo  Agustino Manda,  aliwasisitiza wavuvi hao  kuendelea  kulitumia  soko  hilo kwa tija,  kwani hivi sasa  soko  limekarabatiwa  na kinacho subiriwa  ni wavuvi kupeleka na kuuza  samaki  zao.