Wanaouza Chumvi Isiyo Na Madini Joto Kuchukuliwa Hatua.

Posted on: May 21st, 2020

Wajumbe wa kamati ya lishe endelevu Wilayani kalambo mkoani Rukwa wameazimia kuwachukulia hatua kali za kisheria wafanyabiashara ambao wamekuwa wakiuza chumvi isiyokuwa na madini joto baada ya kuelezwa kuwa inasababisha ugonjwa wa Goita na utapia mlo kwa watoto wenye umri chini ya miaka 5 na kuzitaka mamlaka husika kutekeleza agizo hilo.

Wajumbe hao kwa kauli moja kupitia kikao cha robo ya pili 2019-2020  kilichofanyika katika ukumbi wa mkuu wa Wilaya hiyo, wamesema kumekuwa na changamoto  ya  baadhi  ya wafanya biashara kuuza chumvi isiyokuwa  na viwango na hivyo kusababisha hofu kwa walaji.

‘’Tuzitake mamlaka zote zinazohusika kuhakikisha chumvi yote  inayouzwa  hususani  kwenye maduka  na kwenye minada  inakuwa  na madini joto pamoja na kuhakikisha inafungwa kwenye paketi zenye nembo  ya shirika la viwango Tanzania TBS.’’ Walisema wajumbe  hao.

Akifafanua kikaoni, Afisa lishe wa Halmashauri Doris Lunyungu amesema mbali na kusababisha magonjwa ya goita na utapia mlo, chumvi isiyokuwa na madini joto pia ni chanzo cha kuharibu  mimba kwa akina mama, kuzaa watoto wenye matatizo ya akili na mgongo wazi. Akasema azimio hili limekuja kwa wakati muafaka ambapo Wilaya ya Kalambo inakabiriwa na tatizo la ukondefu kwa asilimia 15 na udumavu wa asilimia 0.2 kwa watoto chini ya miaka 5,  na kwamba wazazi na walezi watahakikisha wanawapa watoto wao vyakula bora na vyenye virutubisho.

Afisa afya Wilayani humo Richard Manuma, amesema idara ya afya imeanza kutoa elimu kwa wananchi ikiwa ni pamoja na kudhibiti uingiaji holela wa chumvi isiyo kuwa  na viwango.

Mkuu  wa Wilaya  ya Kalambo Julieth Binyura  akamwagiza Mkurugenzi mtendaji  wa  Halmashauri  hiyo kuhakikisha anatekeleza maazimio yote yaliyotolewa na wajumbe wa kamati hiyo. Akasema chakula kilicho patikana kutokana na mavuno ya shamba kihifadhiwe na kiliwe kwa wakati muafaka ili kuondokana na tatizo la utapia mlo na kusisitiza kuzingatiwa maelekezo ya wataalamu  wa afya kuhusu kudhibiti kuenea ugonjwa wa Corona ili Wilaya ya Kalambo iendelee kuwa salama.